Vottun hf.

Alþjóðlega flugþjónustufyrirtækið IGS ehf. hefur fengið umhverfisstjórnunarkerfi sitt vottað í samræmi við ISO 14001 staðalinn en fyrirtækið hefur starfrækt vottað gæðastjórnunarkerfi frá árinu 2008.

IGS var stofnað sem dótturfélag Icelandair Group árið 2001 en flugvallarþjónusta á Íslandi hefur verið hluti af starfsemi Icelandair frá stofnun þess. Vottun umhverfisstjórnunarkerfisins nær til flugvallaþjónustu við flugfélög og farþega á alþjóðlega flugvellinum í Keflavík, þ. á m. innritunar farþega, hleðslu, afhleðslu og þrifa flugvéla, fraktafgreiðslu, veitingaþjónustu og alhliða matarframleiðslu, auk reksturs SAGA biðstofu í flugstöðinni.

Tækniskólinn - skóli atvinnulífsins hefur undanfarin misseri unnið að því að innleiða gæðastjórnunarkerfi sitt á fleiri sviðum í starfseminni. Skólinn var stofnaður árið 2008 þegar Iðnskólinn í Reykjavík og Fjöltækniskólinn sameinuðust. Hann er nú stærsti framhaldsskóli landsins og samanstendur af tólf undirskólum.

Þrír undirskólar - Skipstjórnarskólinn, Véltækniskólinn og Endurmenntunarskólinn - hafa verið með vottað gæðastjórnunarkerfi frá árinu 2005 og nú í sumar færðust átta skólar undir hið vottaða kerfi. Þetta eru Byggingatækniskólinn, Fjölmenningarskólinn, Hársnyrtiskólinn, Hönnunar- og handverksskólinn, Raftækniskólinn, Tækniakademían, Tæknimenntaskólinn og Upplýsingatækniskólinn.

Nánar upplýsingar um starfsemi Tækniskólans má finna á www.tskoli.is.

Vottun hf. hefur vottað samræmi gæðastjórnunarkerfis ARKÍS arkitekta ehf. við kröfur ÍST ISO 9001 staðalsins. Nær vottunin til hönnunar- og ráðgjafarþjónustu á sviðum arkitektúrs og skipulags. ARKÍS var stofnað 1997 og eru starfsmenn nú á þriðja tug talsins. Verkefnin spanna öll svið arkitektúrs, skipulags, hönnunar og ráðgjafar og viðskiptavinirnir bæði innlendir og erlendir. Stofan hefur þá sérstöðu að geta boðið upp á heildstæða ráðgjöf fyrir vistvæna byggð og byggingar á öllum stigum hönnunar, þ.e. undirbúnings, skipulags, hönnunar og framkvæmdaeftirlits. Nánari upplýsingar um ARKÍS er að finna á heimasíðunni www.ark.is.

Á síðasta ári sameinuðust fyrirtækin Verkís hf. og Almenna verkfræðistofan hf. undir nafninu Verkís hf. Bæði fyrirtækin voru með vottuð gæðastjórnunarkerfi og umhverfisstjórnunarkerfi hjá Vottun hf. og nú hefur hið sameinaða fyrirtæki bætt við sig vottun á stjórnunarkerfi heilsu og öryggis á vinnustað samkvæmt OHSAS 18001 staðli.

Verkís hefur einnig flutt höfuðstöðvar sínar úr Ármúla að Ofanleiti 2 í Reykjavík. Nýja húsnæðið er um 8000 fermetrar að stærð á fimm hæðum og hýsti áður Háskólann í Reykjavík. Nú starfa um 340 manns hjá Verkís og hefur stór hluti þeirra flutt í nýja húsnæðið. Auk höfuðstöðvanna í Reykjavík er Verkís með starfsstöðvar víðsvegar um landið og einnig í Noregi, Grænlandi og Póllandi.

Í dag, 28. febrúar 2014, fagnar Sorpa bs. vottun umhverfisstjórnunarkerfis síns sem Vottun hf. hefur veitt fyrirtækinu. Um er að ræða vottun á móttöku, meðhöndlun og vinnslu úrgangs í móttöku- og flokkunarstöð í Gufunesi, ásamt rekstri urðunarstaðar og framleiðslu metans í Álfsnesi.

Fyrir er fyrirtækið með vottun á gæðastjórnunarkerfi sínu skv. ISO 9001 staðli, sem það hefur haft frá árinu 2011. Nánari upplýsingar um starfsemi Sorpu er að finna á heimasíðunni www.sorpa.is.

Vottun hf. vottaði nýlega tvö stjórnunarkerfi hjá Landsneti hf. Um er að ræða umhverfisstjórnunarkerfi samkvæmt ISO 14001 staðli og stjórnunarkerfi heilsu og öryggis á vinnustað samkvæmt OHSAS 18001 staðli. Þessar vottanir bætast við vottun gæðastjórnunarkerfis samkvæmt ISO 9001 staðli sem fyrirtækið hefur verið með síðan 2007.

Landsnet hf. var stofnað árið 2005 á grundvelli raforkulaga og er hlutverk þess að annast flutning raforku og stjórnun íslenska raforkuflutningskerfisins. Eigendur Landsnets hf. eru Landsvirkjun, RARIK, Orkuveita Reykjavíkur og Orkubú Vestfjarða. Nánari upplýsingar um fyrirtækið er að finna á heimasíðu þess, www.landsnet.is.

Um mitt síðasta ár komu til framkvæmda ný lög um stjórnsýslustofnun samgöngumála - Samgöngustofu. Þá færðust öll verkefni sem áður heyrðu undir Flugmálastjórn Íslands og Umferðarstofu til hinnar nýju stofnunar, ásamt stjórnsýslu- og eftirlitsverkefnum Siglingastofnunar Íslands og leyfisveitingum og umferðareftirliti Vegagerðarinnar. Framkvæmda- og rekstrarverkefni Siglingastofnunar fluttust á sama tíma til Vegagerðarinnar.

Siglingastofnun Íslands fékk vottun á gæðastjórnunarkerfi sitt árið 2005 og hefur unnið að frekari útvíkkun þess síðan. Með framangreindum breytingum á stofnunum ríkisins þá flyst hið vottaða gæðastjórnunarkerfi Siglingastofnunar yfir á Siglingasvið Samgöngustofu. Hefur virkni kerfisins eftir þessar breytingar verið staðfest af Vottun hf.

Vottun hf. staðfesti nýlega að stjórnunarkerfi Rekstrarsviðs Strætó bs. uppfylltu kröfur alþjóðlegra staðla. Annars vegar er um að ræða umhverfisstjórnunarkerfi í samræmi við kröfur ISO 14001 staðalsins og hins vegar stjórnunarkerfi heilsu og öryggis á vinnustað í samræmi við kröfur OHSAS 18001 staðalsins. Strætó er byggðasamlag í eigu sex sveitarfélaga á höfuðborgarsvæðinu og hefur það hlutverk að veita almenna þjónustu á sviði almenningssamgangna. Undir það hlutverk fellur rekstur almenningsvagna (strætó), ferðaþjónustu fatlaðra og ferðaþjónustu eldri borgara. Nánari upplýsingar um fyrirtækið er að finna á www.s.is.

Undanfarið hafa orðið breytingar á umfangi vottunar hjá nokkrum viðskiptavinum Vottunar hf.

Breytingar voru gerðar á skipan sviða hjá Reykjavíkurborg á síðasta ári sem höfðu áhrif á vottun umhverfisstjórnunarkerfis á fyrrum Umhverfis- og samgöngusviði. Eftir breytinguna nær vottunin til allrar skrifstofustarfsemi Umhverfis- og skipulagssviðs, eins og sviðið heitir nú, ásamt starfsemi Heilbrigðiseftirlits Reykjavíkur, Grasagarðs Reykjavíkur, ræktunarstöðvar, útmerkur, Vinnuskóla Reykjavíkur, sorphirðu og meindýravarna.

Hjá Distica hf. hefur sú breyting orðið að vottað gæðastjórnunarkerfi fyrirtækisins nær ekki einungis til innflutnings, umpökkunar, birgðahalds og heildsöludreifingar lyfja heldur hafa heilsuvörur, neytendavörur og vörur fyrir heilbrigðisþjónustu og rannsóknastofur bæst við þá starfsemi sem vottuð er. Rekstur vöruhúss fyrirtækisins í Suðurhrauni í Garðabæ fellur þar með undir vottað gæðastjórnunarkerfi fyrirtækisins.

Fyrirtækið N1 hefur víkkað út vottaða starfsemi sína. Áður náði hún til þjónustustöðvar og reksturs þjónustuverkstæðis að Bíldshöfða 2 í Reykjavík en nú hafa þjónustustöðvar við Hringbraut, Kringlumýrarbraut og Borgartún í Reykjavík og við Háholt í Mosfellsbæ verið felldar undir vottað umhverfisstjórnunarkerfi fyrirtækisins.

Loks hefur ISAVIA ohf. bætt verkþáttum flugumferðarþjónustu við umfang þeirrar starfsemi sem er innan vottaðs gæðastjórnunarkerfis. Þar með er flugumferðarstjórn, flugupplýsingaþjónusta og viðbúnaðarþjónusta orðinn hluti af vottaðri starfsemi félagsins.

Orkubú Vestfjarða ohf. hefur fengið vottun á gæðstjórnunarkerfi sitt hjá Vottun hf. og nær vottunin til allrar starfseminnar. Félagið var stofnað á miðju sumri 2001 á grundvelli laga sem þá voru samþykkt á Alþingi. Það byggir á grunni eldra sameignarfélags sem var í eigu ríkis og sveitarfélaga á svæðinu. Hlutverk Orkubúsins nær til alls orkuiðnaðar á Vestfjörðum og er tilgangur þess að virkja vatnsafl og jarðhita á Vestfjörðum, eiga og reka vatnsorkuver, jarðvarmavirki, dísilraforkustöðvar og fjarvarmakyndistöðvar ásamt nauðsynlegum mannvirkjum til dreifingar á raforku og heitu vatni til kaupenda. Auk þess annast félagið virkjunarrannsóknir og aðrar undirbúningsrannsóknir eftir því sem ákveðið er hverju sinni. Nánari upplýsingar um starfsemina má finna á heimasíðu félagsins, www.ov.is.